Börgerpries för Herbert Timm

Herbert Timm hett den Börgerpries 2006 vun den Landkreis Harborg kregen. Dormit is he uttekend worrn för sien „Levenswark“, Plattdüütsch in’n Landkreis vörantobringen. Timm is de ehrenamtliche Beopdragte för Plattdüütsch.

De Börgerpries, de dat Motto hett „Kultur verbindet“, is in Gang bröcht worrn vun de Bundesdagsafgeordneten Monika Griefahn (SPD) un Michael Grosse-Brömer (CDU), den Landrat un de Sporkass Harborg-Buxtehud’, de dat Priesgeld geven deit.

Landrat Joachim Bordt hett de Laudatio för Herbert Timm holen: „Dass Ihnen heute der Bürgerpreis verliehen wird, ist nicht nur für Ihr großes Engagement folgerichtig, sondern auch längst überfällig. Dat ward Tiet.“ Dat weer wichtig, dat dat Kulturgoot Plattdüütsch nich in’t Museum schoben, sondern lebennig holen ward.

Herbert Timm is Initiator vun dat Plattdüütschzentrum in Salzhausen un Plattdüütsch-Aktschonen in’n Landkreis: Plattdüütsch bi de Lannesgoorn-Schau in Winsen, plattdüütsch Daag in’t Freilichtmuseum Kiekebarg, Plattdüütsch bi Radio Zusa, de tweespraakig Kreiskort un veel wat anners.